GELAGAT CANDA KAUM RENTAH

Oleh : Achi Breyvi

11-10-2011

STAGE I

(tiga orang kakek sedang duduk sambil beromantisme dengan masa lalu)

Di sebuah warung kopi. Salah satu dari mereka memulai pembicaraan.

Kakek Amdi : dari mana ngoni dua ?

Kakek Tindey : dari rumah noh, masa kwa dari utang. (sambil menepuk punggung Amdi)

Kakek Jelo : (tertawa) kong ngana so berapa lama disini ?

Kakek Amdi : dari kita masih kacili sampe kita so basar. (wahahahha)

Kemudian dilanjutkan dengan lagu oleh Tindey : jaga pigi di kobong, makang batata rubus colo denga dabu dabu.

Kakek Jelo : hahaha ngoni dua memang gila. Bae leh kita waktu dulu capat sajana, jadi tu

gila gila capat da tarubah. Kong bagimana soal ngana pe usaha Tin ?

kakek Tindey : aman – aman. Kita pe peternakan babi so lebe basar.

Kakek Amdi : mar masih ngana yang ja urus ato so ngana pe anak ?

Kakek Tindey : kita noh, soalnya kwa tu babi – babi nimau kalu orang laeng yang mo urus.

Pasti dorang mo protes kalu kita pe anak yang kase makang. Hehehehe

Kakek Jelo : ada eh babi ba protes ? hahahaha.

Kakek Amdi : bae dorang nd ba demo pa nga ?

Kakek Tindey : hahaha ada jang kira nyanda. Justru karena dorang ba demo pa kita, sampe

Dorang kase muncul tu virus flu babi. Wkwkwkwkwkw memang babi kwa ni

Babi – babi.

Kakek Amdi : wkwkwkw depe tuang le kwa sama deng tu beybe – beybe jo !

Kakek Jelo : wkwkkwk, mar eniwey bay de wey bas wey, kong ngana dang Amdi ?

Kakek Tindey : eh io, kong bagimana ngana pe sanggar Teater ?

Kakek Amdi : adoh, itu noh yang jadi kita pe masalah skarang.

Kakek Jelo : kiapa masalah apa ?

Kakek Amdi : bagini, kita pe anak – anak di sanggar so jadi malas. Cuma karna dorang

Pe tampa latian yang biasa dorang ja pake, skarang so beking akang warong.

Ko’ Ped pe warong. Padahal itu ruangan tu dia depe fungsi for kegiatan seni.

Mar, karena Ko’ Ped so bayar, jadi dong lego tu tampa tu dia.

Kakek Tindey : lego ? jual maksudnya ?

Kakek Jelo : nda, lego itu sejenis makanan babi, yang ja kase makang pa ngana pe babi ! wk

Kakek Amdi : waahahahaha io jual kita pe maksud.

Kakek Jelo : setahu kita itu kan memang di khususkan for kegiatan seni ?

Kakek Amdi : io mar, rupa tu pustema leh kwa ni orang – orang yang ja ator itu.

Kakek Tindey : kiapa sapa yang ja ator so itu ? so bukang ngana dang ?

Kakek Amdi : bukang kita. Mar so tu tikus – tikus berdasi gila doi yang ator itu.

Kakek Jelo : yah, itu kwa ngana waktu kuliah dulu, kita so bilang musti blajar sadiki tu

Birokrasi, nda usah talalu idealis, depe laste, apa ?

Kakek Amdi : adoh, bukang kita nimau mar memang kita nda suka.

Kakek Tindey : ngana kwa waktu kuliah dulu rupa tu munir” jowh. Wahahaha.

(mereka bertiga terus tertawa)

· Kemudian masuklah

Kakek Henteng : kudacuki ngoni tiga ba apa disini ? kita dari tadi da tunggu di muka

warong sablah.

Kakek Amdi : kita da bilang kan bakudapa di warong ta Dey, ngana di warong mana ?

Kakek Henteng : di warong di sablah sini noh.

Kakek Tindey : ngana memang babi ! itu warong internet !

Kakek Jelo : maklum jo dia katu baru turun gunung, ada bertapa di atas selama

30 tahun. Cuma mo rumus nomor for mo pasang porkas. Wkwkwkw

Kakek Amdi : marijo somo pigi dang napa dorang so ba sms, somo mulai kata tu

Pementasan.

Kakek Henteng : ngoni tiga blum pernah lia opa – opa basalto ? kudaruju leh, kita mo se

Basalto kwa ngoni tiga noh. Orang so lalah da batunggu di sablah, pe

Pe sampe disini somo pigi.

Kakek Tindey : sudah, marijo, jangan kitape babi – babi datang malendong pangana.

Stage II

(beberapa kru dan aktor sedang mempersiapkan pementasan)

- Ada 2 orang aktor yang sedang di body painting.

- Ada yang mempersiapkan property.

- Lalu ada aktor yang sedang sibuk menghafal naskah

Penjaga gedung : hei, hei apa samua ni dia ? ba apa ngoni disini ?

Roy : kiapa bos ? nda lia ini apa ? da mo pentas ini.

P. Gedung : pentas apa ? kiapa nda kase tau pa torang dang ?

Roy : hi ? sudah so kase tau pa om Ivan dari dua minggu yang lalu leh.

P. Gedung : kong mana ngoni pe surat dang ? kase tunjung kamari.

Roy : so kase maso dari kemarin dang.

P. Gedung : nda ada surat yang maso pa kita.

Roy : surat kan for mo kase pa atasan, supaya dorang kase izin torang pentas.

Kiapa mo kase pa ngana ?

P. Gedung : io memang musti pa kita dulu, baru kita yang antar ka atas. Iko depe

Mekanisme kwa ngoni. Tau aturan sadiki. Manimpang samua ni dia.

Roy : eh, kiapa bagini ? ato ngana sto yang suka torang mo manimpang disini ?!

P. Gedung : malawan ngana kang ?

Roy : kiapa dang ngana kira kita tako pa ngana ? datang – datang sampe. Mo kase

Kacau torang pe acara ngana ? bilang jo kwa trus rang kalu mo minta doi roko!

Torang leh mangarti, mar baku mangarti sadiki kwa deng torang.

P. Gedung : oke dang nanti bakudapa diluar jo torang dua.

Roy : oke, nga kira ta tako so kwa pa ngana.

P. Gedung : bubar ngoni !

(pementasan tidak jadi di adakan)

***

(kemudian para pemain dan krunya mulai mengundurkan diri satu demi satu)

Alo : eh bro bagimana ini ? samua so mengundurkan diri so nimau mo pentas.

Ungke : io ituleh yang kita bingo, kiapa samua kong jadi gila bagitu. Hufft!

Alo : ini sapa pe salah so sebenarnya ? torang ato dorang ?

Ungke : menurut kita dorang yang ja urus ni gedung. Pokoknya pejabat kelurahan le salah!

Alo : kelurahan ato penjaga gedung ?

Ungke : dua – dua pokoknya. Masa rekenan dorang nda mo kase torang pentas disini.

Alo : ada kase surat ato nda so kwa sebenarnya torang ?

Ungke : (menggelengkan kepala) nda, setahu kita memang nda ada surat yang da kase.

Alo : hi ? berarti Roy badusta dang ?

Ungke : roy kurang da improvisasi itu, stilmir dia itu. Setahu kita surat nda sempat di kase.

Alo : adoh, berarti dorang yang ator ni acara tu salah. Nda iko mekanisme yang ada.

Mungkin kalu dorang da kase surat pasti nda mo jadi bagini. Sapa yang bertugas mo

Beking surat so sebenarnya ?

Ungke : roy ! mar dia lupa kata.

Alo : idih, konyol eh! Berarti wajar katu torang dorang beking bagini.

Ungke : io memang torang nda kase surat, mar musti so dorang mo kase brenti ni acara karna

surat ? ini kan memang sarana for kegiatan seni. Apalagi lurah pernah bilang pa torang

kalu ni gedung boleh torang pake kapanpun torang mau.

Alo : io mar katu memang setidaknya pake aturan leh sadiki noh.Jangan komang katutorang

Se enaknya leh. Apalagi rupa ini, so tau – tau salah, mo stel leh torang malawang.

Co kwa kalu da baku ator bae tadi, nda pake emosi.

Ungke : alo, torang nimau mo jadi panjilat, torang nimau mo mengemis pa dorang supaya mo

Kase torang pentas. Torang leh kwa boleh cari tampa laeng ! mar, nanti ngana lia, kita

So nimau mo iko lomba brikut kong mo bawa bawa nama ni kelurahan Sasunrat.

Cuih! Nda sudi kita. Dorang pe kepentingan birokrasi itu nda bisa mo bendung torang

Idealis. Supaya nga tau, kita nda akan mo mengemis pa dorang. Titik!

Alo : ungke, torang leh katu harus realistis, nimbole keras kepala. Biar bagimana dorang

Juga minta di hargai kalu menurut kita.

Ungke : alo, kita so lebe bingo ini, ngana sebenarnya bela sapa so sebenarnya ? torang? Ato

Pihak kelurahan yang urus ni gedung ? dap alia kwa ngana daritadi tentang trus kita

Pe pendapat noh.

Alo : kita belasaphira jo. Nda katu bakusedu. yah jelas torang kan sama”. Jadi kita tetap sama deng ngana no ungke. Sory dang. Marijo tong pi bagate tre.

Keluar.

Stage III

(kemudian 1 minggu kemudian Alo mengikuti perlombaan Monolog antar kelurahan).

- Alo pentas monolog singkat (10 menit).

Alo menjadi pemenang dalam perlombaan tersebut. Dan nama baik dari kelurahan Sasunrat

Ikut terangkat dan dikenal. Pimpinan kelurahan yang waktu itu tahu, keesokan harinya

Menemui Alo ketika sedang bersama dengan Ungke di gedung kesenian.

Alo : biarjo dorang nda kase torang latian atow beking pementasan di gedung ini,

Mar yang penting nda akan membuat torang pe minat untuk berkesenian surut.

Io toh ? bagimana itu ungke ?

Ungke : io, mar mudah – mudahan dorang di kelurahan sadar sandiri!

Alo : eh io, kong bagimana torang pe tamang – tamang yang so patah semangat dang mo

Latian ? ta lia dorang mulai tu hari tu dia rupa so patah semangat mo berteater noh.

Torang musti beking dorang sadar dulu sebelum kelurahan sadar.

Ungke : adoh ituleh noh. Butul ngana bilang, torang musti beking dorang sadar dulu.

(tiba – tiba masuklah

Akhirnya Lurah Sasunrat datang menemui Alo.

Lurah : siang Alo, siang Ungke, ba apa ngoni dua disini ? jangan bilang ngoni batunangan.!

Ungke : adoh pak lurah, so talalu doe itu, kira torang dua ini homo so ?. nd do kang. Biar

Blum laku – laku mar masih normal doe kita. Nintau kalu alo.

Alo : ngana pe setang putar leh deng ngana ungke. Kita leh normal, biar blum laku !

Lurah : sudah – sudah badiam dulu. Bagini, kita dengar Alo da iko lomba Monolog kang ?

Kong dapa juara 1 kang ?

Alo : io pak lurah, biarleh pihak kelurahan nda ja dukung torang anak – anak muda di sini

Pe kegiatan, mar tetap kita bawa nama kelurahan Sasunrat ini.

Lurah : io io, makase banya neh. Ada kwa ngana punya, nanti datang ambe dirumah pa

Kita jo ngana pe bonus.

Alo : ah butul ini pak lurah ?

Ungke : kita dang pak lurah ?

Lurah : io, datang ambe jo sbantar malam tu popaya di rumah, jang somo busuh.

Kalo for ungke datang ambe jo itu sampah, so bobou di dapur pa kita.

Alo : ah ni pak lurah dang. Kita nda butuh hadiah kwa.

Ungke : io doe, pak lurah komang so talalu.

Lurah : sudah badiam jo. Kita tahu apa yang ngoni mau kwa. Co ngana lia disana (menunjuk ke

Arah luar).

(mereka berdua berpaling dan melihat keluar)

Alo : tamang – tamang ?

Ungke : ih, rupa di felem – felem jo ini dapa rasa eh.

Lurah : mulai ni hari, kita kase kesempatan ngoni pake ni gedung for kegiatan – kegiatan.

Yang penting kegiatan yang positif noh.

Alo : adoh makase banya pak lurah, ini yang torang mau memang. Kebebasan berkesenian,

Dengan sarana. Pasti torang akan terus berkarya.

Ungke : pak lurah, mar boleh toh torang ba pancing sadiki disini ? biar Cuma 1 botol bagitu.

Lurah : Ungke, kalo mo ba pancing, di talaga sana! Bukang di dalam gedung.

Ungke : ah pak lurah leh pura – pura nintau le kita pe maksud. Bagate maksudnya.

Lurah : nimboleh ungke. Kalu ngoni bakalae disini boleh, asal jang bagate.

Alo : hahaha pak lurah leh kwa bakusedu. Nanti torang jaga bae” ni gedung ini.

Lurah : io io, kong jangan sampe baku salah ulang deng penjaga gedung ngoni. So itu,

Kalu mo beking kegiatan, kase pemberitahuan kong kase surat pa kita. Jangan

Lupa tu dia.

Alo : oke beres pak lurah. Makase banya neh.

Ungke : thanks neh pak lurah.

Lurah : io, kita somo bale kantor neh. Inga kita da pesan. Selamat siang

Ungke : Ok. Titi dj pak lurah.

Alo : hati – hati di jantan pak lurah ! wkwkwkwkwwk

(kakek Amdy, Tindey, Henteng dan Jelo berdiri dari tempat duduk kemudian memberikan tepuk tangan)

***THE END***